Kim Robinson施髮術 義助長者回春

Facebook     Twitter

 

亞洲殿堂級髮型大師Kim Robinson嘅巧手妙剪，不知為多少名媛藝人修剪過無數自然獨特美髮。早已桃李滿門嘅阿Kim話，近年好少親自出手。不過佢噚日出席懲教署與耆康會合辦活動，唔只破例親自操刀，仲一蚊都唔收，為長者喺農曆新年前，剪番個時光倒流嘅潮流髮型。

 

阿Kim即場示範，一手梳起65歲陳美妮留咗幾年嘅長髮，笑笑口喺佢耳邊話「今年唔興長頭髮」。美妮姐幽阿Kim一默，扮驚剪短會好心痛。阿Kim話：「我都好驚!」兩個人有說有笑，花咗約五分鐘，美妮姐半頭煩惱絲，剪得散落滿地。美妮姐拎起塊鏡，驚訝花容月貌竟然時光倒流到30年前。阿Kim話：「係咪靚到不得了呢?」美妮姐笑逐顏開，當然收貨。

 

應畀機會青少年重生

阿Kim噚日仲向在囚青少年教路，齊齊幫幾十位長者剪頭髮。佢話，自己童年喺西澳洲農家長大，14歲起開始打拼，有今日成就，全憑自己努力同機遇。佢認為，社會應該畀一時誤入歧途嘅青少年重生機會咁話。

 

生命力版權所有 © 2008